كيفية التدريب في المصانع الحربيه خطوه بخطوه

أخوانى فى الله
قرأنا على صفحات الفيس بوك منشور من المهندس أحمد أبو الفتوح
يتناول فيه شرح لكيفية التدريب في المصانع الحربية
ولم يتسنى لنا التأكد من صحة جميع المعلومات في المنشور
وسنقوم بنقل المنشور كما هو لكي يستفيد الجميع
ونرجو ممن يتتبع الخطوات الموجوده فيه ويصل لشئ أن يشاركنا ماوصل إليه
وستجدون رابط المنشور الأصلي للمهندس أحمد أبو الفتوح على صفحته على الفيس بوك أسفل المساهمه
البوست كالآتي :

البوست بتاع كل سنة .. بما اننا فى فترة حجز التدريب ..
==================================
احتراما لوقتك البوست هياخد منك دقيقتين ..
==================================
زى ما قلت قبل كدا .. مينفعش تبقى طالب فى هندسة ومتستغلش وجود تكنولوجيا عالية فى المصانع الحربية و وجود فنيين على مستوى عالى جدا و تتخرج من الكلية من غير ما تاخد تدريب في مصنع او اكتر منهم .. يمكن اكتر المكن المنتشر فى المصانع الحربية هو مكن القطع بالليزر وبالماء و بالشرارة ..
بيسألنى كتير على واتس و اسك عن المصانع الحربية فين وبتعمل ايه ؟ علشان كدا عملت البوست دا بحيث تشوف ايه المصنع القريب منك و تروحه .. وطبعا دى المصانع المعلن عنها واللى الناس كلها عارفينها .. مش حاجة سرية يعنى ..
1- مصنع 99 فى حلوان .. بيصنع صواريخ و الذخيرة الثقيلة ..
2- مصنع 54 فى المعادي .. بيصنع مسدسات ورشاشات ..
3- مصنع 81 هيليوبيليس .. بيصنع قنابل و ذخائر مدفعية ..
4- مصنع 27 فى شبرا .. ذخيرة مسدسات
5- مصنع 200 فى ابو زعبل .. دبابات
6- الهيئة العربية للتصنيع .. فى حلوان .. منتجاتها كتير اوى ..
7- مصنع المحركات .. جنبه فى حلوان
8- مصنع قادر فى مدينة نصر .. بيصنع طيارة مع شوية مدرعات
9- مصنع الالكترونيات .. الكيلو 45 مصر السويس .. اجهزة اتصالات لاسليكية وتخديم على الكترونيات الطيارات والصواريخ .
10- ABD .. جنبه .. نظم صواريخ و وقذائف صاروخية و تطوير عربات لحمل الصواريخ .
11- مصنع صقر .. جنبه .. قاذفات RPG وانظمة صواريخ لفتح الثغرات فى حقول الألغام و عمل الستائر الدخانية .
12- مصنع ABECO فى حمامات حلوان .. بيصين و يعمل عمرة لانواع مختلفة من المحركات.
13- مصنع الطيارات .. جنيه .. بيصنع 3 انواع من الطيارات بالاضافة لتانكات الطيارات و صوامع غلال وسيور ونواقل حركة ..
14- مصنع 100 فى حلوان .. صناعة المدافع ومنظومات الدفاع الجوي و البنادق الالية ومواسير الدبابات ..
15- مصنع الدبابات .. فى ابو زعبل فى القليوبية ..
=======================================
المطلوب منك ايه ؟
1- تتصل من التليفون الارضى ب 140 وتطلب منهم رقم المصنع .
2- تكلم ادارة التدريب فى المصنع علشان تشوف لسة فيه اماكن للتدريب ولا لأ .
3- تاخد جواب تدريب من الكلية او اثبات قيد وتروح المصنع لو لسة فيه اماكن للتدريب .
4- مفيش مشكلة لو انت ملتحي .. انت صحيح هتتدرب فى مصانع حربية لكن مفيش اى اجراءات تعسفية والمعاملة كويسة جدا .. هتلاقى حاجة غريبة جدا ان مفيش واحد فى المصنع كله مبيروحش يصلى الظهر فى المسجد !!
5- فيه مصانع هتلاقيها شغالة بكثافة فى انتاجها الحربي .. ومصانع الدولة مش محتاجة مزيد من منتجاتها فى الوقت الحالي .. فشغالة شغل مدني بجانب انتاج حربي منخفض .. وعموما انت هتاخد تدريب عام .. احنا كنا بنشوف الرادارات الامريكية اللى مصر عملتلها تطوير بتتبنى ادامنا لكن محدش كان عارف اي حاجة جواها .. ولا هيدوك نص معلومة وانت اصلا متسألش لإنها حاجة متهمكش .
6- التصوير فى المصنع ممنوع .. بس ساعة التدريب لما تكون بتتدرب على ماكينات عامة ممكن تستأذن من الفنى او المهندس اللى بيدربك انك تصور اجزاء من الماكينة علشان تحطها فى الريبورت وتقدر تذاكرها .. لو قالك لا اسمع كلامه بدون نقاش .. لا تضر نفسك ولا تضره .
7- فيه كليات عاملة اتفاقية مع المصانع الحربية زى هندسة بنها .. الطلبة بيتدربوا ببلاش .. لكن معظم الكليات بيتدربوا ب 100 جنيه فى الاسبوع .. صدقنى ولا حاجة ..
8- خد بالك قبل ما تروح اى مصنع تسأل فيه تدريب لتخصصك ولا لأ .. وشوف على المصنع اللى بينتج حاجات متعلقة اكتر ربتخصصك .. يعنى لو ميكانيكا روح اى مصنع .. لو اتصالات يبقى تركز مثلا على مصنع الالكترونيات اللى فى الكيلو 45 مصر السويس .. لو ميكانيكا سيارات روح مصنع ABECO .. او مصنع قادر .. وهكذا ..
=======================
ملحوظة1 || البوست علمي موجه لطلبة هندسة اللى بيسألوني عن المصانع الحربية علشان يتدربوا فيها .. مش سياسي ومش حابب التعليقات تحوله لبوست سياسي ..
ملحوظة2 || نفض لأى حد يقولك المصانع الحربية مبتعملش غير مكرونة .. انت بنفسك لما تروح تتدرب هتشوف الدنيا عاملة ازاى جوة المصنع .. سيبك من الفتّايين ..
ملحوظة 3 || علشان تتدرب هتروح مكتب التدريب فى الكلية .. وتقولهم عايز اتدرب فى المصنع الفلاني .. هيجمعوا الطلبة اللى عايزين يروحوه ويعملوا بيهم طلب ويبعتوه للمصنع .. وهيدوك طلب مختوم خاص بيك .. هتروح ادارة التدريب فى المصنع اللى انت عايز تتدرب فيه وتسلم الورقة دى وتشوف مواعيدك هتبقى امتى فى الصيف بإذن الله

أتمنى أن تستفيدوا منه وأن ينال إعجابكم
رابط المنشور على صفحة المهندس أحمد أبو الفتوح على الفيس بوك